पुणे : गेल्या १२ वर्षांपासून ‘आयआयएसईआर’तर्फे आयोजित करण्यात येत असलेल्या मीमांसा या आंतरमहाविद्यालयीन स्पर्धेच्या विस्तारासाठी यंदा प्राज इंडस्ट्रीज आणि ‘आयआयएसईआर यांनी एक सामंजस्य करार केला आहे. त्यानुसार प्राज या स्पर्धेच्या तीन आवृत्त्यांसाठी तांत्रिक, तसेच आर्थिक सहाय्य देईल.
देशातील लोकप्रिय विज्ञान स्पर्धा म्हणून मीमांसा स्पर्धा ओळखली जाते. या स्पर्धेत सहभागी होण्यासाठी कोणतेही नोंदणी शुल्क नाही. दोन लाख रुपयांची पारितोषिके या स्पर्धेसाठी ठेवण्यात आली असून, यंदा २२ शहरांमधील १७०० संस्था यात सहभागी होतील, अशी अपेक्षा आयोजकांनी व्यक्त केली आहे. स्पर्धेची प्राथमिक फेरी १८ जानेवारी २०२० रोजी होणार असून, जाईल आणि मार्च २०२० मध्ये ‘आयआयएसईआर’मध्ये अंतिम फेरी होईल.
‘प्राजसारख्या उत्तम कंपनीने मीमांसाशी जोडले जाणे ही अत्यंत आनंदाची बाब आहे. ‘प्राज’च्या पाठिंब्यामुळेच या स्पर्धेच्या उच्च गुणवत्तेत आणखी सुधारणा होईल,’ असे मत प्रा. जयंत उदगावकर यांनी व्यक्त केले.
प्राज इंडस्ट्रीजचे कार्यकारी अध्यक्ष प्रमोद चौधरी म्हणाले, ‘उद्योग आणि शैक्षणिक संस्था यांच्यातील सहकार्याचा फायदा उद्योग-व्यवसायांनाही होतो. या स्पर्धेमुळे नवीन संशोधनाला चालना मिळते. विद्यार्थ्यांना त्यांचे कौशल्य दाखविण्यासाठी हे एक उत्तम व्यासपीठ आहे.’